Bang Media

Shakisha

Uburyo bwo Kurwanya Umuhangayiko

Abahanga bavuga ko umuhangayiko (stress) ari ngombwa mu buzima. Ariko nk’uko bigenda no mu bindi, iyo bikabije bigirira nabi ubuzima bwacu.

Ibyiza byo guhangayika

Guhangayika bituma umuntu azirikana ko agomba gukora ibintu akanabigumushaho umutima. Ikindi ni uko bituma afata icyemezo cyihuse iyo hari ibimutunguye. Ibi biterwa n’umusemburo uba mu mutwe witwa adrénaline. Iyo utunguwe cyangwa uhangayitse, ubwonko burekura iyi adrenaline, ikaguha imbaraga zo gukemura icyo kibazo uba uhuye nacyo.

Iyo bibaye buri gihe ariko, adrénaline iba nyinshi maze umunaniro , uburakari no kwiheba bikaba byose. Nguko uko umuhangayiko utangira.

Uko warwanya uwo muhangayiko

1. Menya ibiguhangayikishije : menya igihe umutima wawe utera cyane, igituma urakara n’ikikuvuna. Mu gihe utarakimenya, uzahora wumva ko ikosa ari iry’isi yose, maze uhore ushihagura uwo muhuye wese.


2. Menya ibifite akamaro kuruta ibindi mu byo ukora : nushaka gukora ibintu byose umunsi umwe, uzananirwa vuba, stress ikubone.


3. Koresha umubiri wawe : iyo umuntu aguhangayikishije, wumva umujinya ukwishe. Uyu mujinya uzana n’imbaraga nyinshi ; izi mbaraga rero hari abazikoresha nabi, ugasanga nk’umuntu ahise akubita umurakaje.

Iyo ukoresheje izi mbaraga rero, ukora nk’akazi cyangwa sport, urangiza wumva waruhutse mu mutwe, umuhangayiko ukawibagirwa.

4. Ruhuka bihagije : iyo uryamye igihe gito cyangwa ugakora cyane nturuhuke, ugera aho ukumva utameze neza, ukaba wanahora abandi uko kutamera neza kwawe. Fata igihe uryame bihagije kuko bituma umubiri uruhuka, ukazabona uko wongera gukora.

5. Hari abagerageza kurwanya umuhangayiko baba bafite banywa ibinyobwa bikabura umubiri nk’inzoga, ikawa, icyayi n’ibiyobyabwenge. Ibi bishobora kugufasha muri ako kanya ariko iyo hashize igihe bishobora no kukugiraho ingaruka mbi. Winywa cyangwa ngo urye ibyo ubonye, inywere amazi.

6. Hari uburyo bwo kurwanya umuhangayiko ukoresheje umutwe wawe nko gukora yoga, kwicara ahantu hatuje ugatekereza ku kintu iki n’iki kitababaje (méditation).

Ikindi kizwi ni uko kubera kwirirwa twiruka, abantu ntibafata igihe gihagije cyo guhumeka (respiration). Iyo uhumetse hari umwuka mwiza winjira mu mubiri wawe ukumva umeze neza. Uzarebe iyo uhangayitse, ufite ubwoba cyangwa urakaye, umwuka umera nk’uheze, aho bituma na bamwe baraba (évanouissement). Iyo uhumetse rero wirinda ibyo bibazo byose. Fata ku munsi iminota nka 10 winjize unasohore umwuka, maze wumve uburyo biryoshye.

Shyiraho Igitekerezo!

Related Posts by Categories



0 comments:

Post a Comment